झगनखबर
बैशाख ६ । कोशीमा मुख्यमन्त्री केदार
कार्की बिरुद्ध संसदमा संकल्प प्रस्ताव
पेस गरिएको छ । नेकपा एमाले र माओवादी केन्द्रले मुख्यमन्त्री कार्की बिरुद्ध
संकल्प प्रस्ताव पेश गरिएको हो । कोशी
प्रदेश सभाको बैठक शुक्रबार सम्मका लागि स्थगित भएको छ ।
एमाले प्रदेश संसदीय दलका प्रमुख सचेतक
रेवतिरमण भण्डारी प्रस्तावक तथा माओवादी केन्द्रका गणेश उप्रेती र एमालेका
किशोरचन्द्र दुलाल समर्थक रहेको उक्त प्रस्ताव पेश भएसँगै बैठक शुक्रबार ११ बजे
सम्मका लागि स्थगित भएको हो ।
एमाले र माओवादीले दिएको विश्वासको मत
फिर्ता लिएपछि मुख्यमन्त्री अल्पमतमा परेको एमाले प्रमुख सचेतक भण्डारीले बताउनु
भयो । उहाँले भन्नुभयो, ‘संसदीय सर्वोच्चतामा अल्पमतमा परेपछि सरकारमा बस्न मिल्दैन उहाँ
अल्पमतमा परेपछि सरकारको प्रमुख हुन मिल्दैन ।’
असोज २७ गते एमालेका ३९ जना प्रदेशसभा
सदस्यले मुख्यमन्त्रीलाई समर्थन गरेको र असोज १ गते विश्वासको मत दिएको तर
परिस्थितिले मुख्यमन्त्री केदार कार्कीलाई समर्थन र विश्वासको मत दिन नसकेको भन्दै
एमालेले बताएको छ ।
प्रदेशसभामा एमालेका ४०, माओवादीका १३, राप्रपाको ६ र जसपाको १ गरी ६० सांसद
रहेको दल विपक्षी बेन्चमा बसेका छन् । ९३ सदस्यीय प्रदेशसभामा कांग्रेसका २९ र
नेकपा एकीकृत समाजवादीका ४ सांसद रहेका दुई दल मात्रै सत्ता पक्षको बेन्चमा बसेका
छन् ।
९३ सदस्यीय प्रदेश सभामा बहुमतका लागि
४७ सांसदको समर्थन आवश्यक पर्छ । तर, सत्ता पक्षसँग ३३ जनाको मात्र समर्थन
रहेको छ ।
मुख्यमन्त्री केदार कार्कीलाई दिएको
समर्थन फिर्ता गरेका दुई दलको कदमलाई चुनौती दिँदै मुख्यमन्त्रीले राजीनामा पनि
नदिने र विश्वासको मत पनि नलिने अडान नछाडेपछि एमाले र माओवादीले संसदमा संकल्प
प्रस्ताव पेस गरेका हुन् ।
