राष्ट्रपति रनिङ्ग शिल्ड प्रतियोगिता : ६४ पदक सहित सिद्धिचरण प्रथम

ओखलढुंगा १, बैशाख । जिल्ला खेलकुद विकास समिति ओखलढुंगाको आयोजनामा भएको जिल्लास्तरिय राष्ट्रपति रनिङ शिल्ड प्रतियोगितामा सिद्धिचरण नगरपालिका प्रथम भएको छ । ३८ स्वर्ण, २१ रजत र ५ कास्य गरि जम्मा ६४ पदक सहित प्रथम भएको हो । पालिकास्तरिय अन्तरविद्यालय प्रतियोगिताबाट छनौट भएका विद्यार्थी खेलाडीहरुले जिल्लास्तरिय प्रतियोगितामा भाग लिएका थिए । जिल्लाका ८ वटा पालिका मध्य ५ वटा पालिका बाट मात्रै विद्यार्थी खेलाडीहरुको सहभागिता रहेको थियो । 

खिजीदेम्बा गाउँपालिका, लिखु गाउँपालिका र चिसंखुगढी गाउँपालिका भने सहभागी नभएको आयोजकले जनाएको छ । सदरमुकामको खेल मैदानमा भएको खेल प्रतियोगिता चैत २९ गते बाट शुरु भई बैशाख १ गते समापन भएको थियो । भलिबलः महिला, पुरुष, कबडी : महिला, पुरुष लगायतका नेपाल सरकारले तोकेका खेलहरुमा प्रतियोगिता गराईएको थियो । जिल्लास्तरिय खेल प्रतियोगितामा सहभागी भई उत्कृष्ट विद्यार्थीहरु छनौट गरि प्रदेशस्तरिय प्रतियोगितामा सहभागी गराईनेछ । 

। त्यसै गरि मानेभञ्ज्याङ गाउँपालिका ५५ पदक सहित दोश्रो स्थान हाँसिल गर्न सफल भएको छ । २४ स्वर्ण, ५ रजत र कास्य २६ गरि जम्मा ५५ पदक हात पार्न सफल भएको थियो  । तेश्रो स्थान हाँसिल गर्न सफल भएको सुनकोशी गाउँपालिकाले ९ स्वर्ण, १८ रजत, २९ कास्य सहित  जम्मा ५६ पदक हात पार्न सफल भएको थियो । 

प्रतियोगितामा प्रथम, द्वितिय र तृतिय हुने पालिकाहरुलाई शिल्ड, मेडल र प्रमाण पत्र वितरण गरिएको थियो । जिल्ला समन्वय समिति ओखलढुंगाका प्रमुख डिल्लीराम खनालको प्रमुख आतिथ्यमा खेलको समापन गरिएको थियो । प्रथम, द्वितिय र तृतिय हुने पालिकाहरुलाई शिल्ड, मेडल र प्रमाण पत्र प्रमुख अतिथी खनालले पालिकाका प्रतिनिधीहरुलाई वितरण गर्नु भएको थियो । 

प्रत्येक विधाका खेलमा प्रथम, द्वितिय र तृतिय हुने विद्यार्थी खेलाडीलाई मेडल र प्रमाण पत्र प्रदान गरिएको थियो । खेलमा सहभागी भएका विद्यार्थी खेलाडीहरु मध्ये उत्कृष्ट खेलाडी छनौट गरि  प्रदेशस्तरिय खेल प्रतियोगितामा सहभागी गराउने जिल्ला खेलकुद विकास समितिले जनाएको छ ।