जेठ ३२ । जिल्लाको
चिशंखुगढी गाउँपालिका वडा नं ३ स्थित खानीभञ्ज्याङमा प्रहरी चौकी भवनको उद्घाटन
गरिएको छ । नवनिर्मित भवनको बुधबार उद्घाटन गरिएको हो । प्रहरी नायब महानिरीक्षक
राजेशनाथ बास्तोलाले औपचारीक कार्यक्रमका विच उद्घाटन गर्नुभएको हो । कोशी प्रदेश सरकार आन्तरिक मामिला तथा कानुन
मन्त्रालयबाट विनियोजित एक करोड ७३ लाख ३५ हजार ४२२ रुपैयाँमा लागतमा खानिभञ्ज्याङ
प्रहरी चौकीको भवन निर्माण गरिएको हो । उक्त भवन निर्माणको ठेक्का पाएको
पुष्पाञ्जली पी.एस. जेभी कम्पनी प्रा.लिले २०७६ जेठ २८ गते काम सुरु गरी २०७८ माघ
२५ गते सम्पन्न गरेको थियो ।
भवन उद्घाटन गर्दै डीआईजी बास्तोलाले अपराध न्यूनीकरणका लागि प्रहरीलाई नागरिकको साथ अत्यावश्यक रहेको बताउनुभयो । नागरिक पनि बिना बर्दीको प्रहरी भएकाले अपराध न्यूनीकरण र समुदायमा शान्ति सुरक्षा कायम राख्न नागरिकको महत्वपुर्ण दायित्व रहने डीआईजी बास्तोलाको भनाई छ । अनुसन्धानलाई प्रभावकारी बनाउँदै, नागरिकसँगको सहकार्यमा अग्रीम कार्ययोजना बनाएर काम गर्न जिल्ला प्रहरी कार्यालय ओखलढुंगालाई निर्देशन दिनुभएको थियो ।
