यातायात व्यवस्था कार्यालय रुम्जाटारमा लाइसेन्स वितरण शुरु

ओखलढुंगा माघ २९ । यातायात व्यवस्था कार्यालय ओखलढुंगा  रुम्जाटारले लाइसेन्स वितरण गर्ने कार्य शुरु गरेको छ ।  माघ २८ गते बाट अनलाईन मार्फत फारम भर्न शुरु गरेको हो । २०७७ साल फागुन महिनामा कार्यालय सन्चालनमा आएको भए पनि भर्खर मात्र लाइसेन्स दिने कार्य शुरु गरेको हो । कार्यालयले शुरु देखि दर्ता तथा नविकरण गर्ने कार्य गर्दै आएको थियो । ट्रायलसेन्टर उपलब्ध नहुँदा लामो समय सम्म लाइसेन्स वितरण गर्न सकेको थिएन । अहिले ट्रायलसेन्टर भाडामा लिएर सन्चालन गर्न लागेको कार्यालयले जनाएको छ । दुइपाङ्ग्रे ः मोटरसाईकल, स्कुटर र चारपाङ्ग्रे ः कार, जीप, डेलीभरीभ्यान, ट्याक्टर, बस र ट्रकको लाइसेन्सका  लागि अनलाइन मार्फत आबेदन लिन शुरु गरिएको कार्यालय प्रमुख गोपाल दाहालले बताउनु भयो । साथै उहाले भन्नुभयो; “ट्रायलसेन्टरका लागि ठाउ नभएर लाइसेन्स वितरण गर्न केहि ढिला भएको थियो, अहिले भाडामा लिएर शुरु गरेका छौ ।”  रुम्जाटार बाट लाइसेन्स वितरण हुनथाले पछि, माथिल्लो सगरमाथाका नागरिकलाई सहज भएको छ ।  लाइसेन्स लिनकै  लागि काठमाण्डौ, गाईघाट, लाहान वा अन्य कुनै ठाँउ जानुपर्ने बाध्यता हटेको छ । यातायात व्यवस्था कार्यालय रुम्जाटारले लाइसेन्स वितरण गर्न शुरु गरेपछि माथील्लो सगरमाथा लगायतका नागरिक खुशी भएका छन् ।